العدسة نيوز
مقالات مشابهة
ردت الفنانة مها أحمد على منتقديها بعد ظهورها في فيديو بث مباشر تحدث فيها عن رغبتها في العمل عند أحد الشيوخ الخليجين.
ونشرت مها أحمد فيديو عبر حسابها على Instagram قالت فيه: “طبعا أنا صحيت كالعادة على أن الدنيا مقلوبة لأن الجمهور اللي بيحبني اللي مش متنمر زعلان أوي إن أنا بقول أنا عايزة اشتغل عند شيخة، نمرة واحد أنا مليش ذنب بميولك مليش ذنب في أن إنت عندك خلفية بإن اللي بيشتغل مع شيوخ بيروح يشتغل عندهم خدام زي ما بتقولوا”.
وتابعت مها أحمد: “اللي بيقول خدام يبقى هو فعلا خدام، لكن أنا هانم عارفين يعني إيه هانم، الهانم كانت بتتكلم وبتطلب إنها تشتغل مع شيخة من الشيوخ دا بناء على تاريخ الفن من زمان لأن إنتي أو إنت جاهل بيه، لأن تلت تربع مسلسلاتنها أيام استديوهات عجمان وعرين ودبي أيام ما كنا بنسافر نمثل هناك ولما كان ليهم استديوهات هنا في الزمالك والمهندسين كان في منتجين خلايجة بيعشقوا الفنانين منتجين ومنتجات شيوخ خلايجة كانوا بيعشقونا وكانوا بيطلبوا فنانين وفنانات بالاسم وبيعملولهم مسلسلات”.
وأكملت مها أحمد: “فأنا مش ذنبي إن إنتي جاهلة ومش عارفة أو إنت جاهل، وطبيعي لما ممثلة أو واحدة كانت ممثلة طلعت على السوشيال ميديا وبتشتغل على السوشيال ميديا تقول جملتين زي دول بتطلب حد عشان ينتج لها، أنا مستغربة جدا هو سيادة المستشار تركي آل الشيخ هو مش شيخ؟ هو مش بينتج لتلت تربع نجوم مصر هما مش كل فنانينا سابوا التمثيل في مصر وراحوا هناك بيمثلوا في السعودية، هو دا كويس ليهم كنجوم ووحش لمها أحمد عشان تطلبه”.
وأضافت مها أحمد: “أنتوا بتسألوني فين الدكتور مجدي يصرف عليكي لا يا حبيبتي دكتور مجدي بيصرف عليا من زمان أوي الدكتور مجدي مكفي وموفي الدكتور مجدي بيجيب الفلوس كده ويحطها قدام مراته ويقولها اتصرفي، أعملي اللي إنت عايزاه وهاتي اللي نفسك فيه لأن الدكتور مجدي واخد مراته ممثلة بتشتغل فهو عارف أوي إن لازم اشتغل مسألتهوش ليه أيام ما هو كان بيمثل وأنا بمثل بتخلي مراتك ليه تشتغل ما تقعدها ستتها في البيت ولا حلو السؤال دلوقتي عشان التنمر زاد، ما تسألوا الدكتور مراته بتشتغل دكتورة ليه ما تسألوا الصحفي مراته بتشتغل صحفية ليه وبتنزل وبتبقى مراسلة وتروح وبتيجي وبتشتغل على تيك توك”.
وأكملت مها أحمد: “أرجع أقولكم كان ممكن أقصف جبهتكم واقولكم وإنتوا مالكم، اللي أنا مستغرباله أنا كاتبالكم ورقة تخيلوا أنتوا كام فنان على تيك توك، مها أحمد، جمال حجازي، عايدة غنيم، سهام جلال، وائل علي، وائل علاء، وفاء عامر، أيتن عامر، نرمين ماهر، بدرية طلبة، علا رامي، أحمد الدمرداش، عمرو عبد العزيز، وفاء مكي، النجم محمد هنيدي علمهم برنامج كان بفلوس عشان تيك توك يتشهر، جومانا مراد، أحمد فهمي، فادي خفاجة، هادي خفاجة، منير مكرم، رامز أمير وغيرهم، كل دول إنتوا سبتوهم ومسكتوا في مها أحمد كل دول ملهمش أزواج مسألتهمش ليه مبيصرفش عليكي اشمعنى مها أحمد ومجدي كامل عارفين ليه عشان مجدي كامل محترم مش عايز يرد لأنه ليه وجهة نظر أن كلها حسابات وهمية منعرفش مين وراها عارف أنكم عالم افتراضي مش عارفين مين بيهاجمنا حتى رأيه إني مردش”.
واختتم مها أحمد كلامها: “طبعا أنا إن شاء الله هتعالج زي ما كل واحدة مريضة وواحد مريض بينصحني أتعالج بس سيبوني اشتغل عشان اتعالج وأدفع فلوس”.
