الليفر يسعي تصحيح المسار والسيتي لاستغلال عدم الاستقرار

جوارديولا لازم يستغل ان المنافس بيعاني من اصابات افراد مهمة جدا زي ارنولد و دياز و احتمال غياب كوناتي و في الغالب جوميز هيرافق فان دايك و ميلنر هيلعب ظهير ايمن حسب الاخبار

ايضا روبيرتسون كان غايب الفترة اللي فاتت و بعيد عن الملعب مش عارف كلوب هيغامر و يبدا بيه ولا هيكمل ب تسيميكاس

عامة الخط الخلفي بالكامل بيعاني من غياباته كلوب النهاردة ، حتي لو ارنولد دفاعيا ضعيف ، انما هجوميا بيعتبر كالسم لجوارديولا و بيكون صانع الالعاب من انصاف المساحات و محطة ال Switching اللي بتجنن جوارديولا دايما في مواجهات ليفربول ، الكرات القطرية في المناطق العمياء للدفاع

كمان عندنا كلوب بيمتلك مشاكل في الهيكل التكتيكي الخاص به و حتي هذه اللحظة لسة مش محلولة فالافراد متغيرة مش ثابتة ، حتي ثلاثية الهجوم اصبحت رباعية الان بضم جوتا رفقة صلاح و فيرمينو و نونيز و اللعب بهيكل اشبه ب 4 / 4 / 2 مع دخول جوتا للعمق و ترحيل تسيميكاس للامام علي الجانب الايسر و حمايته ب فان دايك و تغطية فان دايك ب فابينيو او هيندرسون

الاستقرار التكتيكي ل جوارديولا يديله افضلية النهاردة عن كلوب

فالاحتمال الاول ، اذا استغل جوارديولا كل هذا بشكل صحيح و بشخصية اكبر ، قد يحقق جوارديولا نتيجة من اكبر النتائج في تاريخ مواجهة الفريقين و هتتسجل ب اسمه في التاريخ ، ف دي فرصة مش هتيجي تاني بصراحة ..

٢ – الاحتمال التاني و اللي السيتي دايما بيقع بسببه في انفيلد بالتحديد هيا هوية ليفربول ،

خلينا متفقين ان ليفربول مع كلوب هو واحد من ضمن اكبر الفرق الحماسية في الكورة حاليا و ده مش بسبب شخصية مدرب رسخها علي مدار سنين في شخصيات افراد داخل الملعب فقط ، الفكرة في تحفيز هذا الحماس و اخراجه للواقع بيكون عن طريق جماهير انفيلد اللي صوتها ممكن يوقع الدهان من علي جدران النادي من كتر شدته

و بالتالي شخصية حماسية زي كلوب ، جماهير حماسية زي انفيلد ، كإنك ضاعفت منهج الهوية نفسه و علي اساسه بتحفز ضغط الفريق للامام و جعل الخصم مختنقا و خصوصا سيتي جوارديولا

ليه خصوصا سيتي جوارديولا ؟!

لان مرحلة بناء اللعب الخاصة ب سيتي جوارديولا نسقها بطئ و هو ده جوارديولا نسقه من الابطأ للاسرع في المراحل ، يعني مرحلة البناء بطيئة ، التدرج اسرع ، الاختراق بتكون الاسرع

ف ايدي هاو شاف انه لو ضغط عالي و بنظام تكثيف عددي في العمق ب ٥ لاعبين ف هو بيشل قرارات الافراد في مرحلة البناء لانها في الاصل بطيئة ..

كلوب بقي بيعشق ضغط المطاردة ” Aggressive pressing ” و دي اكتر حاجة بتخنق سيتي جوارديولا عموما و بالتالي سلاح كلوب النهاردة برغم مخاطرته بعض الشئ هو ضغط المطاردة المعتاد و ترك اي ظروف اخري مثل الاصابات و حالة الفريق

فكرة انك تقفل هوية الهيمنة للسيتي عن طريق الضغط هيا الطريق الوحيد ل ليفربول ليكون منافسا حقيقيا للسيتي اليوم ، اذا سمح كلوب لبيب ان يبني الهجمة بدون ضغط عالي سيسمح له بفرض الهيمنة التي يعشقها و كون جوارديولا يوصل مرحلة خلق الفرص و الاختراق متلومش غير نفسك لانك هتخسر المواقف كلها ..

و علي فكرة ليفربول كلوب كان بيكسب سيتي جوارديولا خصوصا في انفيلد فيما قبل و اخرهم ماتش السوبر في ويمبلي بسبب الضغط و ليس اي شئ اخر ، لانك بتروح تعمل شلل لاكتر مرحلة بطيئة لجوارديولا ف مش بتوصله للمراد ..

عندنا احتمالين ، ملهمش تالت ، قرارات جوارديولا و كلوب هيا اللي هتحسم احتمال منهم يحصل ..

الكلمات الدلالية: مانشستر سيتي ، ليفربول ، كلوب ، جوارديولا ، الدوري الانجليزي ، الجولة الحادية عشر

الليفر يسعي تصحيح المسار والسيتي لاستغلال عدم الاستقرار

مقالات مشابهة

كتب/ احمد فؤاد

شاهد أيضاً

اترك تعليقاً إلغاء الرد